純如羔羊女講師
請你睇清楚個標題，唔係赤裸羔羊都唔係沉默的羔羊，係純如羔羊！
專上課程女講師喎，有碩士學位，話晒都知識份子吖，點純如羔咩法呢？
話說係網上交友識的，初時只交換了wechat。一開始傾我話自己有做教過中學小學及專上學生的通識、記者同大富翁班，同佢都算係同行，剩係傾點教好學生或點對付壞學生，都已有排傾啦。
咪話我唔教精你，呢招叫投其所好，梗係傾啲共同的話題開始，否則偈都無得傾，點做人世呀！有次有個女士同我講，第一次識個金融才俊，仲以為係筍盤，但金融才俊不斷同佢講第一手環球財經走勢，仲有幾個投資心得靚號碼醒佢，諗住可以取悅女士，但女士一句都聽唔明，轉話題才俊無耐又講番金融，女士都唔知幾想走！
女講師雖然唔肯講教邊間大學，但講咗中文全名我知，一分鐘唔夠我就起到佢的大學、職位同幅相，個樣又幾靚女喎。但呢吓好似嚇親女講師，佢無估到我起底咁叻，極度懷疑我本身係識得佢的，係度玩嘢整古佢。
愛情吉日 大爆感人身世
係網絡咁盛行的年代，女講師連咁簡單的「起底」都未玩過！好多年前當我讀緊大學時，我已經打自己個名睇下搜尋到啲乜，發現台灣有條友同我同名同姓，係佢結婚的網頁嚟，佢個老婆成個林志玲咁款，嗰陣我已經係毒男一個，呢刻我先知道咩叫同人唔同命！
當時我係我教育版記者，同各間大學的公關大員都好熟，同女講師任教嗰間大學的公關仲要熟到痹，但女講師話唔知公關係負責咩工作。
我登時已覺得，女講師都幾單純。千祈唔好以為學歷好就乜都知呀，好多博士教授都唔知三串七、四串十一係乜！
當日越傾越好傾，連我去聽講座同出席一個悼念儀式，都不斷掛住同佢wechat。真係好似有講唔完的話題咁。
傾到下午五點幾，我提出不如見吓面，女講師立即應承，約咗大半小時後係銅鑼灣Sogo門口等。
查實我一早已到咗。
老老豆豆，當時我好鬼死驚，個心不斷卜卜跳。為咗唔好嚇怕對方，同俾條路大家行下，我買份報紙扮睇遮住個衰樣，諗住佢睇唔啱拎轉身走，都仲有彎轉下。
點知佢一嚟到就認到我，笑容滿面咁問我去唔去飲嘢，佢帶路我去咗坐得好舒服嗰間雪糕店。
去咗雪糕店，我又將女神個故事講俾女講師知，點知佢一路聽一路話「咁似既」？
唔係女講師似女神，而係女講師一樣有暗戀別人的經驗，結局當然同我一樣係食咗蕉！不過女講師比我叻的地方，係睇得好開，佢話「人哋唔鍾意你就係唔鍾意你，千祈唔好諗番轉頭」！
暗戀的人惟一影響到女講師的地方，就係學咗對方一樣鍾意動漫作品，最鍾意睇海賊王。大學女講師睇鍾意睇海賊王，真係單純得嚟幾可愛。我細個都鍾意睇動漫，個人大咗都耐唔時有睇老夫子同多啦A夢，新的動漫就唔識了！
一時之間，兩個同是天涯淪落人真係互相激起憐憫之心，當下就決定睇下夾唔夾到，可唔可以發展得到！
以上的事係一日之內發生咋！仲未完架，我送女講師番屋企時，仲講咗以前係泰國有個女朋友，雖然已分手，未來都會去探吓佢！女講師話佢只暗戀過人，未拍過拖喎！
回程時，女講師what’s app我講咗兩樣嘢。第一係話好在乎我的泰國前女友，我應承佢唔會去見佢。第二樣嘢就好K怪，「你介唔介意我的學歷？」反反覆覆問咗好多次！
婚前婚後 我要做博士！
我都有私立大學的學士學位，女講師話自己係碩士，至多高我一「呢」之嘛，又點會介意喎？女講師講真話我知，原來已讀緊博士學位！我呢世人只識得一個博士，叫則卷千平，花名IQ博士。
「導師話博士學位係女士的魔咒，未嫁的女士如攞咗博士學位，就呢世都嫁唔出，個個都係咁！」
但我都唔可以即刻娶你做老婆架！
當然，其實都唔需要太擔心，皆因讀博士唔同讀學士碩士，可長可短，好在女講師話佢導師都建議佢，拖慢嚟讀直至嫁咗先完成博士學位都得！
咁都無咁驚！
傾咗成日真係好似幾傾Key咁，第二朝女講師話佢阿媽想見下我......個樣，咪send張相俾佢呢個疑似「未來外母」睇下。疑似「未來外母」話我幾老實喎。
第二次見面兼食飯，我仲問咗女講師有幾多錢，可以做首期買樓。雖然女講師事後話咁快講呢啲係咪快咗啲啲，但佢都話咗我知，住邊度都無所謂，最緊張俾個櫃佢放書做嘢便可。
投入工作 大起大落
個頭係就係開得幾好，但查實女講師好忙，復活節四日假都無時間出來，仲有啲文字上的修訂想我幫手睇下，我係就係做過幾年記者，但本科係新聞唔係中文，中文邊夠佢好吖，咪玩我啦！
我自己嗰期又鬼死忙，接job接到無停手，食咗幾次飯後就少咗聯絡。有時就係咁奇怪，你唔搵吓我，我又唔搵吓你，咁就會慢慢無咗。
隔咗一排都有出來食飯與睇戲，但話題少了聯絡也少了。
結局唔難估到，感情亦係無疾而終了。
後記：
咁多位女士之中，女講師的反應較大，佢唔想呢啲段故事出街，回應係：「坦白說，其實關於我們的相處片段，我並不想刊登出街......（下刪數十字）我們的相處，對你來說是失敗的經驗，對我來說也是一樣，我並不希望有關的回憶被公開，回憶放心裏就好了」。
女講師即係女講師，佢的回應係最清晰兼且有理據。呢段文章應否出街呢？不如出咗街睇下有咩反應仲好了。
留言
張貼留言