小師妹與小師妹
各位男士們唔知你哋有無試過，讀書時溝女，溝女時......梗係溝女；讀書時追唔到同一級的女生，就向師妹們埋手，機會梗係好似高啲咁，因為點計都高佢一班，有啲優越感嘛。
呢故事就係涉及兩個小師妹，機會當然係......哈哈哈！
話說係一間報館工作時，同team坐隔離位係一位係大學低我一屆定兩屆的小師妹，彼此轉工後都仲有聯絡。有次唔知傾開啲乜，講講吓講到去搵對象呢個問題。
呢位師妹A相當靚女兼好身裁，有時仲著背心返工，當年有「XX日報之花」的美譽，我仲記得有做設計的男同事時時追問我關於A的事，直頭話想溝佢，可見A幾得人鍾意！
講到去搵對象，A又未有男朋友，我梗係打蛇隨棍上！「你都算高大威猛吖！」A咁樣讚我，呢次仲唔得米？
「不如我介紹個好朋友你識吖！」這些機會幾時都不是我的！「但你都係時候搵對象喇喎！」我話。
宅男毒男我當然識唔少，我介紹番一打俾佢都得，我唔似梁振英咁老點同我同姓的議員麥美娟話介紹三個男人俾佢又走數當無件事。同行兼死黨J同我差唔多年紀又未結婚，咁咪啱晒。
就係咁，就約咗一次男女子混合相睇賽，地點係A屋企。事前仲講笑咁講，如果大家都成事就一齊擺酒，咁就高興得多。兩pair一齊擺酒的婚宴你去過未吖？
兩男VS兩女 勝負難料
J話當識多個朋友無壞，即係去啦，扮晒嘢！
點解要去A屋企呢？事關佢租的屋好特別，租間房但個廳同其他租客共用，個廳好鬼死大，開幾枱麻雀都得。
事前我同J講明，A已經請我食咗蕉，另一個B我都未見過，唯一機會亦係B，咪同我爭。四個都係同行做傳媒，甫見面J原來識得B的，世界真細小。當晚四個人無打麻雀，玩大富翁同其他Boardgame，玩過不亦樂乎。
我閒來有研究大富翁仲係公開比賽得過三甲，仲有係中小學教大富翁班，專家嚟架！
玩係其次，重點當然係交換電話。事後我有約B出來吃飯，發現了B有一樣好特別的嗜好，與她的生肖有關。
第一次兩個人食飯，我選擇一間日本菜任叫任食放題，呢間放題好抵食，任點唔嬲又多選擇，B都鍾意食嘢，成晚我仲懶有風度咁幫B點食物「畢」食物，食得傾得好開心，直至我將一塊肉放到B的碗，B面色大變......
動物農莊 感懷身世
嗰塊係燒羊架，B忽然面色一黑問我：「乜你食羊架？」
蒙古盛產羊肉，雖然我唔係一代天驕成吉思汗，亦唔識彎弓射大鵰，都可以食羊肉，有咩問題呢？
「啲羊咁可愛你都食？」
原來B生肖屬羊，唔單止屬羊仲好鍾意羊，屋企有好多隻羊公仔，合稱叫「阿咩」。佢話有次佢阿哥掟咗隻「阿咩」落街，B嬲咗佢阿哥好耐。去親旅行如台灣之類地方，一定帶埋「阿咩」去，更會去親親小綿羊，總之就係羊，全部都係羊。
因此之故，絕對唔會食可愛的羊肉！
「咁我都唔食了」！投其所好嘛！
我屬蛇，我都唔食蛇的，原因唔係我鍾意蛇，只係無乜錢食咁貴的蛇。
我同蛇最親近的時候，就係每次做嘢時「蛇王」的時候。另有一次，做一單新聞係大年初一港島區有蛇，警方call晒全港島同九龍的蛇王都無人浦頭，卒之call到新界先有蛇王肯出動，我起咗個標題係：「初一現蛇蹤 蛇王也蛇王」，好多人都拍案叫絕呀！
講番餐飯，食得非常開心，之後都成日有約見面。有次講笑話B係羊我就係豬。有大段時間，我同B係what’s app成日傳無內容的訊息，我打一隻豬，B就回一隻羊，我打兩隻豬，B就回兩隻羊，如此類推，成個動物農莊咁，不過呢個農莊只有豬同羊。
「豬」
「羊」
「豬豬」
「羊羊」
「豬豬豬」
「羊羊羊」
除了what’s app外，B要求每晚臨瞓前都傾半小時電話，來個枕邊人語，以免成日唔見又唔通話變成網戀。從對話中，仲得知B父親早逝，媽媽重男輕女剩係錫佢阿哥同細佬，讀大學連學費都唔俾，B要去另一間大學做兼職搵錢，先完成到大學學位，幾鬼慘。
但B都幾緊張，有次B去咗外地做嘢，當晚我錯手按熄咗手機個wifi，成晚無收過任何訊息，第二日開番，B就what’s app我話「你唔理我喇？」
我覆B話本來以為佢出咗埠，享受吓旅程都應該，認真唔好意思。
當時又係接job接到無停手，查實真正陪到B的時間都唔算多。B有出過聲，我同佢講過話安排好啲工作，必要時分啲工作俾人，減少工作賺少啲陪佢多啲。
但性格極度貪錢的我，分啲工作俾人即係分錢俾人，邊肯制。結果都係做到無停手，無乜陪B，有時夜晚仲唔記得打俾B添。
B都因此唔高興，卒之有次係電話中佢開口先話「不如算啦」。
唉，良緣又結束了。
後記：
B早已嫁人仲已有埋小朋友。
B睇完呢篇後的回應：「哈哈，咁多年我都唔記得啦，得啖笑！寫得幾好，難得你記得細節，我完全無印象了！」
我係B心目中完全不值一晒！
A同J又點呢？B係話過我知，J好似鍾意A但A唔吼佢，A亦同我講過，J好似矮過佢，所以唔考慮！我夠高大威猛啦，A親口講過架喎，咪又係唔考慮我！
四個人一齊擺酒？諗下好喇！
忽發奇想，如果真係有人咁樣擺酒，我哋四個資深傳媒人一齊嚟採訪，可以賀一賀佢，因為呢個確實係奇景。
幸‧匯 網址 ：https://www.matchingloves.com/match.html
WhatsApp：9540 8200 電話 ：2610 1811
留言
張貼留言